Posted by: lizenhs | May 16, 2010

KABA BAGALAU KABA RANG SAISUAK DI KIKTINGGI

KABA BAGALAU KABA RANG SAISUAK DI KIKTINGGI

Ditulih dek Haslizen Hoesin

Untuak malapeh kanangan, iko ado babarapo catatan singkek Kaba Bagalau Kaba Rang Saisuak di Kiktinggi jo salingkuangnyo. Kananganko antaro taun 60an sampai 70an, paninggalan Bulando jo Japang. Katigo jangko wakatu kajadian tu nampaknyo indak dapek dipisahkan. Tulisan Kaba Bagalau, Kaba Rang Saisuak Di Kiktinggi ko kalanjutan dari Kaba Bagalau Kaba Rang saisuak di Bukittinggi. http://lizenhs.wordpress.com/2010/05/16/kaba-bagalau-kaba-rang-saisuak-di-bukiktinggi-2/ Salamaek mambaco, maingek-ingek jo maniakmati.

Namo sebutan/panggilan Bukittinggi menuruik rang Agam banyak, yaitu; Pasa, Kiktinggi, Bukik, Gaduang dan Bukiktinggi.

Salain Jam Gadang ado pulo ampek jam kaciak. Jam kiciak tu di Birugo, Bukikambacang, Parikpituih dan di Bukikcangan. Nan di Bukikcangan di buek panduduak

Ka bawah ngarai di apik tabiang di suok jo kida udaro dingin tabiang taraso di badan jalan, mancalik ka suok tampak ngarai dalam, ka kida ado lubang kalam, Lubang Japang kecek urang. Takuik masuak kadalam, suasananyo memang seram apolai kalam, taruih ka bawah jalan babelok kecek urang itu namonyo jalan Ciikkabaubanyak.

Angkutan panumpang antar kota dan provinsi tahun 60-an barang-barang nan dibao panumpang tampeknyo di ateh atok oto. Suatu ari tasangkuik di Jambatangantuang karano talalu tinggi.

Sampah Bukiktiggi sampai tahun 60 an di baka di Palalo (kini jln Haji Miskin), indak dibuang ka Ngarai. Carobong (manara) asok pembakaran tu kini disabuik tugu dek masyarakat sekitar. Bangunan pambakaran sampah tu paniggalan Bulando. Bangunan tu kini dijadian apo yo?

Ka Sungaijariang. Suok-kida banyak paraweh antah sia nan punyo, sambia baranang di ngarai diambiak, makan paraweh ciek duo untuk mangganja paruik litak.

Lapangan golf panah ado di Kiktinggi yaitu di Bulakangbalok jo di Pambidian. Lapangan golf di Pambidian kalau ndak salah diresmikan dekAli Geno.

Angkutan barang atau asia parak jo sawah jarak jauah jo padati, jarak dakek jo garabak demo, garabak randah dan garabak jengki. Padati tu pakai ganto, kalau bairiang-iriangan lamak tadanga di talingo. Padati tu diirik jo kabau atau jawi

Kok di Benteng tampaik bamain siluncua, dulu benteng indak ado nan manjago mamintak pitih pambali karcis. Basiluncua pakai papan, maluncua ka bawah di rumpuik nan licin, kok panek ganti jo main bola. Dakek bangunan benteng kadang dipanjek pai ka ateh bangunan. Mamanjek di pipa nan ado di samping sampai ka lantai 2 tampak dari ateh sakaliling Bukit Tinggi. Kalau ka Benteng bisa malalui janjang dari jalan Tembok kampuang Cino (janjangko kini lah batutuik ruponyo) atau malalui Kampuangjao. Di Kampuangjao ado rumah gaya saisuak (lamo), acok dikunjuangi bule. Rumah ko aset pariwisata Kiktinggi lo.

Tampek basiluncua nan lain di lereng rumpuik di adoan Tri Arga. Kalau basiluncua indak takuik gai sarawa atau baju kacabiak tasangkuik dek kawek, nan paralu tantangan kawan bisa di awak kok indak.

Babarapo oto angkutan antar kota dan provinsi nan ado tasurek pos, oto tu mambao surek, otoko biasonya ndak panah talambek.

Lai takana A Karim, sanak awak tu maningga kanai tembah di patamuan jalan Luruih jo Jalan Tembok. Dibariangkan di toko Martabak Kaka, sasudah tu dibao dan disamayamkan di SMA I Landbouw. Dimakamkan di tanah tampek ditagakan Surau Al Akram. Antah taun bara karangka tubuah (tulang-tulang) di pindahkan ka Taman Pahlawan.

Bukiktinggi nan tanang, bendi adolah angkot nan popular di maso tu, ado pulo kusia tembak, bendi japuik-anta kasikola. Banyak urang pakai karetangin dan paliang banyak bajalan kaki. Alun ado oplet, bemo atau pun ojek. Oto sajo wakatu jarang, nan ado oto dinas ciek-ciek. Jadi jan ditanyo motorpit, satahu ambo ndak ado rasonyo.

Koretangin nan dipakai bamerek Humler, Raleight dll. Ado karetangin Jengki, Rem taromol. Koretangin padisi jo laki-laki babeda, kareata laki-laki ado batangnyo luruih, padusi malangkuang kabawah. Koreta Raleigh bapersneleng sarato badatiak-datiak.

Tabayang Pasaateh sabalun tabaka, dulu ado loih Bagaluang peninggalan Bulando. Banyak kesan di situ nan indak bisa hilang di kapalo. Kok bajalan saketek kalua dari Loih Bagaluang sampai ka Pasalereng, disitu tampak hamparan sawah jo Musajik Tangahsawah, Surau inyiak Jambek jo Surau Gonjong. Surau Inyiak Jambek tampaik Ulama Gadang di Minang Shyeh Jamil Jambek ulama jaman dulu nan mambuek Imsyakiyah untuk padoman bapuaso.

Lai takana anak-anak nan pai sikola dari Baso, Biaro jo Tanjuangalam naiak koretapi kasikola di Bukik, kalau ari Sinayan baju putiah alah itam bintiak-bintiak kanai baro asok karetapi. Anak-anak tu turun di stasiun ketek Pasabawah diadoan Surau Nyiak Jambek

Onde Kiktinggi taun 60-an nan takana, bantuak Jamgadang jo Onggoan Pasaateh basarato jalan Komidi baleret oto bus Cheprolet basarato klason oto Sibualbuali nan ka pai ka Padang, Medan dan Riau. Oto bus Taratai dan Harmoni ka Lubuakbasuang. Oto Tri Arga Bukittinggi ka Padang.

Di Pasaateh, Pasabawah jo Pasalereng urang manggaleh ari Rabaa jo Satu di bawah payuang karateh, kalau lah patang ari payuang tu di kucuikkan. Jalan Pasalereng kalau salain Rabaa jo Satu bisa dilewati oto jo karetangin dan main papan baroda dikadudui manuruni jalan diadoan Pasalereng.

Onde itu sanak, di adoan Tri Arga ado gerbang bagonjong dibari gambar sambutan urang jo datuak-datuak pakai carano kadatangan tantara pusekka Kiktinggi. Onde baukia pulo, tacangang awak mancaliaknyo.

Lai takana museum, ado kapa tabang di mukonyo, di samping ado jalan ka ateh sampai lah di bioskop Sovia. Dulu di subarang jalan itu ado SD 5 jo SD 6, di sampingnyo ado markas Korem 032 Wirab Raja dakek Tri Arga di bawah jam Gadang. Tapi kini sadonyo lah barubah, ado hotel namonyo Novotel. Lalok di Novotel taraso lalok di ateh bangku sakola, takana dek ambo ka guru-guru SD dulu, antah kini masih ado atau indak Pak Abu, Ibu Nafisah, Ibu Rosmaniar, Ibu Mai dll.

Ooo…. Dek, Novotel sakola pindah ka Pasajawi. Kini kabanyo ndak Novotel lai, The Hill. Onde tacangang jo sadiah awak mandanga, kok pakai namo babau asiang. Dulu sajo inyiak-inyiak awak manyabuik Fort de Kock sajo bapantang bana, salalu manyabuik Bukiktinggi, KikTinggi, Pasa atau Gaduang. Iyo lah babeda prinsip urang kini. Iyo lah tajajah baliak nagari awak yo, atau mungkin lah lupo tatacaro mambari namo tampek, antahlah.

Tau ndah, itu dimuko percetakan Nusantara (jlnTembok), Tarun (namo sabananyo Sjahrul) jo kawan-kawan manyanyi lagu nan tadanga kompak dan lamak ditalingo. “Tinggalah kampuang Ranah Balingka. Gunuang singgalng tagak manjago” baitulah kiro-kiro ratok Tarun. Nyanyi ko muloi dipadangakan saat papisahan SMA Lanbouw di Gedung Nasional. Nyanyi tu dipolulerkan dek Elli Kasim.

Tu, itu Tugu Pahlawan Nan Tak Dikenal di adoan Istana Bung Hatta, lai takana ndak, jalan manuju hotel Djogja. Diateh no dulu kan api nan bagajolak, kini jadi urang. Ondeeeee barubah?

Kalau dulu cuma ngarai dakek rumah sakik nan runtuah tapi kini tabiang-tabiang di ngarai sadonyo lah barubah.

Dulu masuak Panorama indah babayia. Dulu banamo Taman Palipurlara. Disitu banyak urang baleha-leha (santai kecek urang kini) atau makan angin istilah urang dulu, karano lah latiah manggaleh di kadai. Di tamanko bisa mambali abuih ubi jala sambia minum kopi O (indak bagulo).

Sabalun Parantian oto bus di Pasabanto (terminal baru) dulunyo di Auatajungkang. Si Coraik nan maneteng kain saruang….., Padang pak…., Padang…., Padang……., banyak suko jo duko nyo wakatu tahun 70-an ka barangkek ka Taluakbayua, papisahan di Auatajungkang.

Si Manjo nan bagalintin jo minyak manih, duduak di Janjangampekpuluah, amuah mainda anak gadih nan lain, kalau tau si manjo lah posisinyo di parantian oto Pasabanto.

Pareman di Mandiangin nan mantiko (Amkartago), tapi indak saparah kiniko lagaknyo, manunggu alang-alang putuih. Arago bingkai alang-alang (padangpanjang nan panjang umbai-umbai) amuah samo jo saikua kambiang tukaranyo.

Nak urang Bantolaweh basarato parewa Atehngarai nan suko malagak di ari patang, indak ado jalan lain, pasti tatumbuak di Atehngarai.

HBT (Hok Beng Tong – Himpunan Bersatu Teguh) di jalan Luruih jo macam ragam Barongsai jo silek Kungfu macam dulu.

HTT (Hok Tek Tong – Himpunan Cinta Teman) di Kampuangcino nan saliang basaing mancari kadet Cap Go Meh.

Lai takana carito amio-amoi di Kampuangcino (Cingkolin).

Murik-murik Ustad Shaf basarato buk Ida jo ni Upik guru Ngaji, kok lai takana nan di adoan Jam Gadang di sabalah ASIA tailor apaknyo Oscar Ramli. Masih banyak guru-guru ngaji dari Pintukabun, Nyiak Wahid dari Masjid Raya Pasaateh, nan dari Atehngarai, Anakaia, Mandiangin, Simpang Landbouw, baa ambo tau…., dek karano alah dijajaki surau-surau tu, dek karano indak pandai mangaji, indak namuah tamaek Al-Quran.

Sasudah bagolak, banyak sikola SMA siswanyo nan baumua, sikola baliak. Ci..cici….. samangaeknyo paralu awak conto/taladani. Sasudah bagolak to rumah Paseban Kiktinggi banyak pulo diuni dek gaek-gaek nan tanamo di Agam, Sumatera Barat, Sumatera Tangah atau mungkin urang Sumatera kali, makan gratis disitu. Zaman Bulando jo Japang Paseban tu baitu juo. Ondeeee…., kalau baitu jadian sajo rumah Paseban tu jadi bangunan basejarah (Heritagekecekrang kini) dari pado di uni deh antu.

Toko gulo-gulo “Cinta Manis” muko Jam Gadang jo “Suka Manis” nan di Pasalereng, “Toko COAN” nan terkenal jo Roti Manih dan Roti Ambanyo dulu.

Pareman Pasadagiang nan dari Tigobaleh, jo Pareman Pasaikan (Nan dari Pasisia Lauik Padangpariaman).

Mak Utiah, nan maliua tiok sabanta jo gitar, lagu-lagu Kus Plus dan Beatels nyo, …….. lai takana ndak mangicuah, mambaco buku ampek dikecean tigo. Buku-buku Ko Ping Ho nan paliang baru indak bisa batahan saminik di lamari gaektu, ado sajo nan ba manuang manunggu kanti nan sorang lai salasai mambaco, baitu jou nan di Pasabawah dakek rel karetapi, lupo ambo (mak Malin kalau indak salah).

Itu di pasa Lereng diadoan loih dagiang lai takana makan ampiang baddiah, nan basisunguik alah putiah sisunguinyo salasai makan. He..hehe……

Bajalan di Kiktinggi ari pakan (satu-rabaa), di nan basalingkik-salingkik, ati-ati, sinan banyak tukang cacak, sakik indak taraso, tapi tagagau

Tukang sate nan indak bakapalo di Benteang jadi acuan pareman barambun di Benteang, sia nan talok mananti tukang sate ndak bakapalo. Ado pulo kusia bendi nan indak bakapalo.

Ondeeeee…. ituuu, ado pulo siswa SMA nan padusi dicaik itam paonyo. kalau laki-laki sarawa, onde ba’a kok sarupotu? apo panyababnyo?

Bantuak jo roman kanti-kanti awak dari lua Kiktinggi, kalau lah rami alek di Pacuan Kudo, sagalo macam kanangan, ado anak sikola manjujuang boto limun dari Tembok ka Bukikambacang, kapai barek mamabao boto, lah tajua abih, tapi boto kosong paralu dipulangkan ka toke limun, kakaknyo si Peco (Antonius).

Arago lado di Pasabawah bilo ari pakan (Rabaa jo Satu) barubah tiok jam atau tiok satangah jam bahkan saparampek jam mungkin tiok limo minik. Barubah tu bisa naiak bisa turun tagantuang suasano. Kecek orang kini sarupo jo pasar modal.

Basalingkik-salingkik malalui Janjang jo jalan di sekitar Pasalereng wakatu ari pakan
Kabakaran Pasaateh nan abih sa abihnyo, sampai kabulakang pasa, Loihgaluang sampai ka Bopet Sianok.

Pasa malam nan banyak jo main Kim basarato judi ampoknyo, di modali dek toke Medan, amuah bagai kawan ba situngkin di dakek meja bulu ayam nan tarojok (taunjam) di dindiang ba nomor gadang jo ketek (1 sampai 10).

Kok baralek pacu kudo di Bukikambacang, sakola libur local, libur duo hari. Sadonyo urang tumpah ruah ka ateh bukik, basorak mancaliak kudo bapacu. Kuburan Cino jadi saksi, antah baa rasonyo tuu urang-urang yang lah jadi mayit itu di dalam, anta sanang antah tagaduah jo sorak sorai, agam…… agam kecek panonton nan mancaliak kudo balari. Padohal nan balaritu kudo dari Solok, Pikumbah, Batusangka dan Padangpanjang. Ado pulo pacu bendi bugih.

Ado pulo rumah gonjong di jalan Pintukabun, rumahtu pernah tampek manginap Soekarno jo Hatta wakatu ka Bukiktinggi dan tampek manginap tamu-tamu nan datang ka Kiktinggi. Dihalaman rumah tu ado pulo luak (sumua) nan indak panah kariang. Rumah ko acok pulo bule mancaliak. Tantu elok di pugar aset pariwisata komah

Didikan Subuah di akhia tahun 60 an, didikan ala militer janyo, barih babarih mambantuak pribadi nan kuaek janyo Ustadz. Ado pulo dramben didikan subuah

Mandaki Gunuang Marapi jo Singgalang, jalan kaki ka Maninjau lewaik Ngarailambah, taruih ka Bukikkapanehan (basuo jo urang tukang potong kapalo), taruih ka Matua turun ka Lawang, pulang nyo baliak ka Kelokampekpuluahampek.

Pai baburu ka Kamang (manembak babi jo arimau), disambiakan maelo kalikih nan lah masak di parak urang, numpang lalok di dangau inyiak di tangah rimbo.

Katan Mak Idi di Pasaateh, campua jo Teh Talua, wakatu pagi, alun bagosok gigi lai alah mancangkuang di adoan kadai baliau.

Bopet Sianok kok lai nan takana, nan tasabuik iyo Soto basarato Jus Pokat, Jus Tomat dan Estebak.

Cilok masuak bioskop Eri sacaro podom jo Mak Lam. Mancilok masuak lapangan bola Atehngarai kakau ado patandingan bolamalalui pintu lewat bulakang ngarai. Mamanjek dari kakuih di bioskop Irian, wakatunyo kalau lah tadangan Satu Nusa Satu Bangsa
Ah…..! Banjak lai nan lain

Bahan “Kaba Bagalau Kaba Rang Saisuak di Kiktinggi”, sebagaimana diceritakan Wahyudi, Masrur Siddik, Qamaruzzaman, Syaiful Abbas, Munadir Syah, Asvi Warman Adam, Tarmizi Firdaus, Widodo (Gapuak) dan Yunaswindra.

Baca Juga: Kaba Bagalau kaba Rang Saisuak di Bukiktinggi http://lizenhs.wordpress.com/2010/05/16/kaba-bagalau-kaba-rang-saisuak-di-bukiktinggi-2/

About these ads

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Categories

Follow

Get every new post delivered to your Inbox.

%d bloggers like this: